Rayの人生長跑 第27回 上篇 - 龍虎際會

以下是22-10-2006早上七點左右，與霍大俠一眾長跑片段 (白色跑衫的正是rayray)

開始時大家都輕輕鬆鬆，左起 - 華英雄，霍大俠，rayray，潘神醫

左起，華英雄，大舊哥，潘神醫，霍大俠，rayray

跑完20km後，rayray 辛苦到嘔既樣就係咁架啦。

============================================

昨天真係太甘，搞到我要咁早起身抽時間報導返尋日既精彩過程，報導之前，首先要鳴謝下列等人：

#1 霍大俠 - 感謝霍大俠友情相邀，進行左尋日既特訓。rayray 要多多跟前輩們學習，希望可以練好d全馬。

#2 大舊哥 - 全程為我地做左流動水站，流動儲物室及攝影師，thx a lot！今次大舊哥有傷在身，希望下次跟大舊哥學野。

#3 潘神醫及華英雄 - 全程大家暢談"股金"中外，真真一樂也。

-------------------------------------------------

開始入正題：好耐無以Rayの人生長跑為題寫blog，皆因長跑必須有返咁上下長，先稱得上長跑，尋日就真係夠晒長，全日夾埋竟然跑左35km，大出我既估計......至於點解標題叫做龍虎際會呢？龍者，霍大俠幾位高手，絕對稱得上卧虎藏龍啦，全馬3小時1x喎，夠晒強啦！虎者，當然係指rayray啦！咁自大？非也，此"虎"乃辛苦個苦也，所以標題就名為「龍虎際會」。究竟rayray 何苦之有呢？

• 尋日rayray為左唔好遲到失禮人，教好鬧鐘早上5:30，平時rayray一般都9點幾起身，起早咁多，夠苦啦掛？
• rayray近來雖然加長左練習既時間，但最長連續跑，都只係14km，聽到要連續跑成20km，真係有d驚驚地，心理負擔都唔少。
• 全程要跟住班精於全馬跑手，跑足20km，你估唔辛苦架？
• 況且跑到半程左右，太陽開始猛烈，對於rayray慣於太陽差唔多落山先練習既跑友尼計，又係一苦啦掛！
• 仲有一樣就係：rayray拜入羅Sir門下雖然日子尚淺，但唔想過於失禮，自然就有幾多力都盡量谷晒出尼啦，跑完真係成個人都散晒架！

講返尋日既過程，其實rayray一直都好佩服霍大俠佢地，個個都係全馬既精英，所以一直都想跟佢地學下野，尋日終於有機會...... 可惜大舊哥有傷關係，只係踩單車，亦因為咁而改為來回跑大王爺廟至馬鞍山，全程約20km。做好熱身後大約7點鐘開始跑，一開始霍大俠深明rayray功力有限，都好就住rayray尼跑，大約以5分幾1km既速度前進，佢地亦都氣定神閒咁一邊吹吹水一邊輕鬆跑，咁跑法就自然輕鬆又舒服啦。

講少少題外話，平時成日同羅Sir班跑友一齊練跑，但輕鬆邊跑邊傾既機會真係少之又少，皆因大家一般都跑到上氣唔接下氣，真係想傾計都有心無力架，好似尋日咁跑法可以話係幾難得，所以跑起尼過程輕鬆又愉快，傾傾下仲談起"股"，論起"金"添，真係開正rayray果飯。所以唔覺唔覺rayray就講多左，過後諗返真係有d臉紅耳赤，黃毛小子竟在班門弄斧......

到左跑到半程左右，太陽開始有d猛，但霍大俠佢地能征慣戰，太陽幾猛都影響唔到佢地，不但速度無慢到，而且更加快地推進，難為rayray只好頂硬上啦，不過見到霍兄速度全程都好平均，真係非常佩服，而霍兄亦都話比rayray聽，跑全馬最緊要keep住均速，千萬不可時快時慢，前段可以稍為慢少少，中段後可以慢慢快返少少，若果加得太快就好易爆，尼d咁好既經驗就自然要好好記在心裡啦！到差唔多尾段，速度差唔多4.5min/km，捱到last 1km，就將所有剩餘既能量都用埋佢，結果last 1km - 03'51"53完成。

以下係霍大俠既精彩日誌，有興趣請到一看http://hk.myblog.yahoo.com/jw!pptqNHSFER_mP6zrWLndQTLMnOw8uA--

p.s.：忘記一提，rayray 係國慶盃同樂華盃都跑輸比大舊哥，佢長短皆宜，真係唔到rayray 唔心服口服！

>